Մահացել է Պատրիկ Դևեջյանը

Այսօր հայտնի դարձավ, որ նոր կորոնավիրուսի համաճարակից մահացել է ականավոր ֆրանսիահայ քաղաքական գործիչ Պատրիկ Դևեջյանը։ 

Դևեջյանը (ծնվել է 1944 թ․ Ֆոնտենբլոում) եղել է աջակողմյան կուսակցության անդամ (Ժողովրդական շարժման միություն),  Ֆրանսիայի Հանրապետության Ազգային Ժողովի պատգամավոր, Փարիզին հարակից Օ-դը-Սեն շրջանի նահանգային խորհրդի նախագահ,  Անտոնիի քաղաքապետ։ Մեծ ավանդ  է ունեցել Հայաստանի Հանրապետության և Ֆրանսիայի Հանրապետության միջև բարեկամական կապերի ամրապնդման գործում, ինչի համար էլ Հայաստանի Հանրապետության Անկախության տոնի առթիվ 2014 թվականին պարգևատրվել է Պատվո շքանշանով։ 

Դևեջյանը հանդես է եկել նաև իբրև անկախ պաշտպան մի շարք կարևոր դատավարությունների ժամանակ։ Այդ գործում նրա կարևոր հաղթանակներից մեկը եղել է Մոնթե Մելքոնյանի դատական գործը։ 1982 թվականին Մելքոնյանին մեղադրում էին կեղծ փաստաթղթեր կրելու և Փարիզում թուրքական հյուպատոսության վրա կատարված հարձական մասնակցության մեջ։ 

Ապրելով Սփյուռքում՝ Դևեջյանը հանդիսացավ այն լավագույն օրինակներից մեկը, թե ինչպես կարելի է լինել օտար երկրի քաղաքացի ու մնալ հայ՝ հավատարիմ ազգային ինքնությանն ու դիմակայել հայ ազգի դեմ ուղղված մարտահրավերներին։