Սփյուռքի ապահովագրական համակարգի փորձը․ ԱՖՀԻԼ

Տարեվերջին Լիբանանի «Վանա ձայն» հայկական ռադիոյի եթերում 2019 թվականին իրականացրած գործունեության վերաբերյալ ամփոփիչ հարցազրույցով հանդես եկավ AFHIL (Armenian Fund for Health Insurance in Lebanon, այսուհետ՝ ԱՖՀԻԼ)-ի տնօրեն Հակոբ Լադոյանը։ Վերջինս տարին բնորոշեց որպես դրական և գոտեպնդիչ մթնոլորտում անցած շրջան։ Կառույցին անդամակցածների թիվը արդեն անցել է 7000-ը։ ԱՖԻԼ-ը ունի գործող չորս մարզական կենտրոն, հրատարակվում է «Զգույշ» պարբերաթերթը։ Տարվա ընթացքում ԱՖԻԼ-ը «Փրկենք մի կյանք» ֆոնդի խողովակով աջակցել է առողջական լուրջ խնդիրներ ունեցող 12 անձի։ Ըստ բանախոսի կառույցը անմասն չի մնում նաև Լիբանանի հայ աշակերտությանն ու ուսանողությանն ուղղված աջակցության ծրագրերից, որոնցից օգտվել են 186 ուսանող և 200 աշակերտ։ 2019 թվականի հոկտեմբերից Լիբանանում տիրող ներքաղաքական ճգնաժամի պայմաններում տեղի հայ համայնքի համար ԱՖԻԼ-ի գործունեությունը առավել կարևոր է դառնում՝ ներառելով նորանոր մարտահրավերներ։ Այս մասով կառույցի տնօրենը լիահույս է, որ իրենց կհաջողվի պատշաճ կերպով իրականացնել հանձն առած ծրագրերը։
ԱՖՀԻԼ-ը Լիբանանի հայկական առողջապահական փոխօգնության հիմնադրամն է, որը ստեղծվել է 1998-ին: Կառույցի հիմնադիր կազմակերպություններն են Համազգային Հայ կրթական և Մշակութային Միությունը, Լիբանահայ Օգնության Խաչը և Հայ Ընկերային Ծառայողների Միությունը։