Նոր Նախիջևանի հայ համայնքը պահանջում է ազատ արձակել հայ գերիներին

«Հարգելի՛ հայրենակիցներ, արդեն 8 ամիս է, ինչ հայ ռազմագերիների հարցը լուծված չէ: Ամբողջ աշխարհի հայերը հավաքվում են միասին արդարություն պահանջելու համար»,-այս նախաբանով է սկսվում Ռուսաստանի Դոնի Ռոստովի հայ համայնքը ներկայացնող «Նոր Նախիջևան» հայկական համայնքային կառույցի 2021 թվականի հունիսի 16-ի հայտարարությունը։ Պատերազմի առաջին օրերից իր նշանակալի աջակցությամբ աչքի ընկած համայնքն այսօր էլ անտարբեր չի մնում հայրենիքի խնդիրների նկատմամբ։ Հունիսի 17-ին, հայտարարության համաձայն, Դոնի Ռոստովի Սուրբ Կարապետ վանքի մոտ նախատեսվում է հանրահավաք՝ ի պաշտպանություն Ադրբեջանում պահվող հայ գերիների իրավունքների, ուր կհրապարակվի հանրային կոչ այս հարցի շուրջ։ Հատկանշական է, որ հիշյալ հայտարարության մեջ արդեն առկա են հարցի լուծումը ապահովելու ունակ պետական և միջազգային կառույցների անուններ։ Այսպիսի գործնական օրինակները, անկասկած, համասփյուռքյան համերաշխություն և շարունակականություն են պահանջում։