իԳործ․ մասնագիտական փորձի զարգացում ՀՀ-ում Սփյուռքի 20 հայրենակցի համար
Սփյուռքի գործերի գլխավոր հանձնակատարի գրասենյակը սկսում է նոր նախագիծ, որը նպատակ ունի ներգրավելու Սփյուռքի մեր հայրենակիցներին ՀՀ կառավարման ոլորտ։ Նախագիծը կոչվում է «իԳործ»։ Այն հնարավորություն կտա Սփյուռքի համալսարանավարտ 20 հայի իրենց մասնագիտական հմտությունները զարգացնել ՀՀ կառավարման համակարգում։ Ծրագիրը իրականացվելու է 01․07․2020-30․06․2021 ընկած ժամանակահատվածում։ Հայտերը ընդունվում են մինչև սույն թվականի ապրիլի 15-ը։ Հայաստան տեղափոխվելու ամբողջական ծախսը և տեղում կեցության ծախսերը (336․000 ՀՀ դրամի սահմաններում) հոգում է ՀՀ կառավարությունը։ Այս մասին հաղորդեց ՀՀ վարչապետ Նիկոլ Փաշինյանի հետ հանդիպման ժամանակ Սփյուռքի գործերի գլխավոր հանձնակատար Զարեհ Սինանյանը։ Կազմակերպիչները հույս ունեն, որ մասնակիցների մի մասը ծրագրի շնորհիվ հայրենադարձվելու որոշում կկայացնի և կշարունակի գործունեություն իրականացնել Հայրենիքում։
Մնում է հուսալ, որ ծրագիրը իրատեսական հաշվարկների հիման վրա է կառուցվել։ Այդ պայմաններում հնարավոր կլինի ներգրավել լավագույն մասնագետներին այնպիսի ոլորտ, ինչպիսին պետական կառավարման համակարգն է։ Մի հարթակ, որտեղ արհեստավարժ մասնագետների կարիք միշտ է զգացվել։ Մեզ մնում է հաջող ընթացք և արդյունավետ շարունակականություն մաղթել ծրագրին, որը փոքր, բայց կարևոր պատուհան է բացում դեպի Հայրենիք։
